The Digital Manipulus/Scotichronicon Project

_______________________________________________


Cap. 31 (D.E.R. Watt et al. eds., vol.6, pp.92/94)

Scocia igitur mirabiliter ymmo et feliciter sgacitate custodis respirans, cum unusquisque secure in suo persisteret et terram ut solito coleret sepissimeque de inimicis triumpharet, magnates et potenciores regni fonte invidie debriati conjuracionem clandestinam contra custodem vultus virgineos sibi pretendentes sed caudis adinvicem colligatis sediciose confinxerunt. Unde quidam qui suis per ipsum municipiis ac dominiis erant restituti exclusis penitus ab eisdem Anglicis elato corde et rancoroso animo adinvicem susurrabant dicentes: 'Nolumus hunc regnare super nos.' Plebei tamen et populares una cum pluribus de nobilioribus quorum mens sanior erat et ad rem publicam proclivior laudabant Dominum eo quod ipsi per talem propugnatorem ab amulorum ausibus erepti propriis poterant laribus confoveri. O stolida fatuitas fatuorum! Wales non se ingessit ad regnandum, sed amotis xii prius nominatis eleccione statuum erigitur ad rectorem. Et cum tu Scocie acephala teipsam defendere nequiveras, ipse brachium tibi extiterat immane et salus in tempore tribulacionis.

O emula invidia! Cur in tantum dominaris in Scocia? Scotorum, proth dolor, natura est odire non solum aliene sed et proprie patriote felicitati. Et hoc respectu inferiorum ne sibi coequentur, respectu superiorum quia eis non equantur, et respectu parium qui sibi equiperantur. In hoc poterunt assimilari Caim qui invidit Abel prosperitati, Rachiel Lie fecunditati, Saul David felicitati et, ut ita dicam, Scotus Wales magnanimitati. Sic per invidiam procuratus est lapsus cleri, ruina populi et casus regni.



©2016-25 Chris L. Nighman
History Department
Wilfrid Laurier University
Waterloo, Ontario, Canada

Creative Commons License
This work is licensed under a Creative Commons
Attribution-NonCommercial-NoDerivatives 4.0 International License.


The editor gratefully acknowledges that financial support for this project has been provided in the form of a 2015 Category A Research Grant partly funded by WLU Operating funds and partly by a General Research Grant awarded to WLU by the Social Sciences and Humanities Research Council of Canada (SSHRC). This website was updated in 2025 by Evan Morris, with funding from a WLU SSHRC Exchange: Digital Resource Grant.