The Digital Manipulus/Scotichronicon Project

Dominus de Percy Henricus comes Northumbrie huiusmodi Anglorum infortuniis plusquam credi potest aggravatus, collegit sibi exercitum vii armatorum ad destruendum et depopulandum universum comitatum domini Georgii de Dunbar. Et in expedicione procedens usque ad silvam de Dwns, ibidem prima nocte castrametatus est. Ubi pauci de verletis et garcionibus Scotorum de nocte ad exercitum Anglorum clanculo accedentes, cum sonoribus instrumentis pellium lignis extensis lapillos infra se continentibus strepitum horridum moventes, nobiliores emissarios et Anglorum equos deterrentes, fractis eorum ligamentis et frenis, teris ac habenis, invitis suis dominis terram Anglie prepropere petere compulerunt. Propter quod Anglici insompnes tota nocte armis contecti, pedestres prestolabantur Scotorum adventum timidi; sed nichil unde formidare deberent perspicientes, de mane lanceas in scapulis ferentes non sine magno dedecore, propria letancius derisi percierunt. Laudandi sunt tales adolescentes vernaculi, qui de tali juperdia fuerunt previsi, qua tam immanis exercitus perterritus fugam, nemine impellente, compulsus est arripere;

Eo tempore quo Henricus Percy ad Dwns, ut premisimus, accessit, sibi dominus Thomas de Musgreve miles custos Bervici cum potencia armatorum ad subsidium accessurus occurrit. Cui latens in abditis ex insidiis erupit dominus Johannes deGordon cum inferiore potencia et ex improviso. Cuius subita apparicione, Musgreve cum suis circumventus et nimium perterritus fugam iniit; sed non valuit, quia ipso ab insequentibus Scotis capto cum valencioribus suis, et quibusdam interfectis, ceteris captis et fugatis, mirabilem victoriam de ipsis triumphator Gordon est adeptus. Eadem tempestate multos et victoriosos assultus exercuit de Anglis; et expertus est in Westmarchia dominus de Joneston necnon et alii valentes Scotigene, qui, quasi cotidie de inimicis prevalentes, magnifice triumpharunt. Quorum gesta commemorabiliora, etsi non omnia, singillatim scriptis commendare, si non militaribus, aliis tamen delicatis lectoribus ecclesiasticis tedium generaret.