The Digital Manipulus/Scotichronicon Project

Eo in tempore Eadwardus de Balliolo moram traxit in Galweia apud Brintile. Qui adunatis sibi Galwallensibus cum domino de Percy hostiliter Laudoniam invasit ipsam igne et ferro devastans; et a Fawkirk ad Glasgw pertansiens, simili furia invectus per Conyngham et Nyddisdal, in propria est reversus. Propter huiusmodi direpciones et hostiles invasiones reelectus est Senescallus Scocie in custodem. Qui propterea de novo vicecomites ballivos et officiarios instituit, et custodiam Castri Puellarum domino David de Lyndesey commisit. Ea tempestate Willelmus de Douglas filius Archibaldi Tyneman, fratris herois Jacobi qui a paganis occisus est, reversus est a Galliis (hic eciam fuit primus comes de Douglas), venit ad Douglasdal terram suam nativam tunc recenter Anglicatam, et confestim sue opinioni eos reflexit et postead Forestam de Ethrik sibi attraxit. Cuius felicibus auspiciis invidens Johannes de Cowppeland tunc de Roxburgh capitaneus congregata armatorum multitudine ad Thevidaliam se transtulit, sperans perinde Thevidalenses ad fidem Anglorum confirmatos exhibere. Sed mentita est iniquitas sibi. Nam contra eum Thevidalenses unanimes cum Douglas assurgentes, ad fugam Cowpland cum suis pepulerunt; et ad persuasionem Douglas fidem regi David firmaverunt. Iste Willelmus fuit valde bellicosus; et quando maxime desiderabat pacem et marchias suas servari in libertate, movebat acriter guerram.