The Digital Manipulus/Scotichronicon Project

Eodem modo fecit hic Henricus Francis. Qui cum percepisset duces Burgundie et Aurelian' caros cognatos vel semel simultates inisse, sic de plano practicavit ut et ipse cum armata manu Anglicorum stipendiaretur et transiret in subsidium ducis Johannis Burgundie, et consimiliter junior frater suus herus Thomas cum consimili vel majori potencia ingereret se duci Aurelian'. Et sic hii duo fratres quasi alter contra alterum sed verius alter pro reliquo ad explorandum infirmiora terre de modica scintillula focum tam fervidum in Franciam succenderunt ut adhuc facule eiusdem flamminonie de facili non extinguntur. Unde actum est huiusmodi occasione per ipsorum dolosam industriam ut dux Aurelianen' cooperante ad hoc arte Johannis ducis Burgundie sediciose Parisius occideretur, et abhinc tota quasi Francia ferro et flamma Anglorum strage sevissima et intestina malicia deperiret. Sic et ipsa ut premisimus Wallia stetit in se firme radicata donec simultates et prodiciones conciperentur intra se. Nam in principio sue guerre cum seniore Henrico mote possessiones suas egregie sunt defensi. Ad quorum tunc supplementum Karolus rex Francie misit principi Wallie tamquam suo ab antiquo confederato inclitum bellatorem baronem de Rocheford Britannum marescallum tunc Francie cum armatorum duobus milibus, quorum quingenti erant milites et lanciferi mille eciam et quingenti valetis armez et albalastrarii, una cum magna summa auri et diversis apparaturis armorum preter stipendia navigii et victualia missorum. Que tamen victualia missorum. Que tamen victualia una cum classe Francorum Anglici magno navigio insequentes prope Mylford in Sowt Wallia destruxerunt, Francis remanentibus fere per annum in Wallia et honorifice remissis per principem ad propria. In principio conquestus Wallie Eadwardusde langschankis prodicione ipsam conquesivit. Nam ipso rege Anglie cum exercitu ad Walliam properante nec de facili in interiora terre propter arctitudinem viarum et destrictus quasi immeabiles patuit exercitui acessus, donec unus de procerum primoribus et nobilioribus sanguine tocius Wallie Penvyn' nomine mercede conductus docuit regem certos passus circa silvam securibus succidere et per eam meatum exercitui facere ut vel sic de facili valeret de Wallensibus intentum assequi. Quod et factum est et huiusmodi seductoria introduccione tota quasi Wallia deperdita est, unde infra breve rex Anglie Eadwardus Walliam partim conquesitam et partim de novo edificandam cepit. Refecit ac construxit xxxvii castra munitissima. Ad quam statim accessit ille Penvyn proditor proprie patrie petens sibi a rege exhiberi competens salarium propter ipsius consilium regi opportunum. Cui rex: 'Salarium, Penvin, meruisti. Et ideo cum justum videatur quod unusquisque secundum laborem mercedem sit accepturus, juxta malum tuum meritum et nominis proprii interpretacionem excelsiorem te faciam ceteris et pendere gloriosius, eo quod in tota parentela tua ceteris generosior esse comprobaris.' Erectum est ergo summum patibulum in quo suspensus est traditor soluto tamen sibi prius auri pondo immenso sibi pro facinore compromisso secum ad horam pendulo in omnium proditorum speculum et dedecus annotandum. Et sic subacta est Wallia usque tempus secundi Richardi regis qui eam majori dignitate Wallicis donavit. De hoc conquestu vide supra libro x capitulo xxxviii.