The Digital Manipulus/Scotichronicon Project

_______________________________________________


Cap. 56 (D.E.R. Watt et al. eds., vol.3, pp.430/432)

Hic prior statura erat procerus, moribus compositus, et in cunctis agibilibus circumspectus. Nam oculo cautele imminentes pacienter sustinuit injurias, et manu prudencie celerius detersit irruentes;

et ut de ceteris eius virtutibus taceam corde erat humilis, verbis gravis, animi prudens, loquendi affabilior, ulciscendi tardior, remittendi paracior; multum amabat humiles, corripuit arrogantes. Non fuit gestis fraccior, non incessu dissolucior, nec voce petulancior; sed ipsius corporis et habitus species intuenti fuerat simulacrum mentis, et figura probitatis. Quid in singulis morer?

Cui quam vigil sensus, discreta racio, docile ingenium, precellens clerimonium, herens memoria, sciencia diserta, commendabilis operacio – facta adhuc clamant, eciam si nostra silescat oracio. Qui eciam qualis quantusve et quam religiosus fuerit, regendique policia preditus, lector a canonicis et aliis circumvicinis qui eum in vita noverant ediscat. Sed et de eo haud dubium filii Dei, qui exurgent in hoc monasterio, enarrabunt fratribus suis, ut cognoscat generacio altera, et ponant in Deo spem suam, et non obliviscantur opera prioris, sed et semata eius exquirant. Nam plures sui discipuli sub eius disciplinatu imbuti, virtutum apices assecuti, confestim post eius decessionem ad alia loca famosa assumpti sunt in patres et pastores, quorum unus episcopus Rossensis, alii duo in Scona et Emonia abbates intitulantur, tres eciam successive in priores de Monymusk preficiuntur. Nec mirum quia provisione prioris duo eorum magistri in theologia, quorum unus sibi in prioratu successit, alter in Scona prefectus; duo eciam licenciati, et quinque bachallarii in decretis extiterunt.

Sanctiandree tunc claustralis paradisus ad suavem spirantis austri clemenciam, quasi tot floribus vernabat, quot virtutum viris insignibus habundabat, quando in claustralibus cerimoniis, in diebus huius prioris viguit monastica compago.

In Marthe sollicitudinibus refloruit juristica propago, et in scienciis theologicis efferbuit seraphica indago. In primis pax et concordia morum, in secundo pax et proporcionabilibatis studiorum, in tercio pax et progressus meritorum, in conspectu Dei suavem et in auribus hominum dulcem melodiam reddiderunt. Multa quidem et alia bona fecit in vita sua, nam terras tempore casus incendii ecclesie impignoratas redemit, et sine debitis cum stauro ferri, plumbi, asserum, lignorum, bituminis, salis et auri in deposito monasterium liberum, cum numeroso fratrum collegio in pace dimisit. Et in magno senio vitam finivit in camera prioris crastino Sancti Johannis Baptiste Nativitatis anno domini m° cc° xvi. Seditque prior annis xxiii, et in capitulo novo repositus est ad patres suos, in future resurreccionis gloria cum justis, ut speratur, premia percepturus, quia non est verisimile quod Summi liberalitas Conditoris non respondeat eius laboribus religiosis recompensacione condigna, qui de sue pietatis habundancia merita suplicum excedit et vota. Unde:

Hic Jacobita, fulgens velut gemma polita,
in claustri vita vixit velut vir heremita.



©2016-25 Chris L. Nighman
History Department
Wilfrid Laurier University
Waterloo, Ontario, Canada

Creative Commons License
This work is licensed under a Creative Commons
Attribution-NonCommercial-NoDerivatives 4.0 International License.


The editor gratefully acknowledges that financial support for this project has been provided in the form of a 2015 Category A Research Grant partly funded by WLU Operating funds and partly by a General Research Grant awarded to WLU by the Social Sciences and Humanities Research Council of Canada (SSHRC). This website was updated in 2025 by Evan Morris, with funding from a WLU SSHRC Exchange: Digital Resource Grant.